Act 25 | BCO | STEP | Festus e gamani misa꞉ ho꞉giyo꞉ dowakiyo꞉, ho꞉len otaleno꞉ Sesalia sa꞉ga꞉yo꞉, e Ya꞉lusalem halonamio꞉ a꞉na ane.

Acts 25

Fol eyo꞉ Festus siwa꞉la kagayo꞉.

1 Festus e gamani misa꞉ ho꞉giyo꞉ dowakiyo꞉, ho꞉len otaleno꞉ Sesalia sa꞉ga꞉yo꞉, e Ya꞉lusalem halonamio꞉ a꞉na ane. 2 Festus e a꞉na fa꞉la꞉dowabikiyo꞉, bobalo꞉ so꞉mia꞉sen misa꞉ kalu i o꞉lia꞉ Yu ko꞉go꞉do꞉ kalu i o꞉lia꞉yo꞉ elo꞉wa fa꞉la꞉dowakiyo꞉, Fol elo꞉ hala dimido꞉ a꞉no꞉ emo꞉wo꞉ malolo꞉ me. 3 Festus eyo꞉ iyo꞉ asuwa꞉foma꞉ki, iliyo꞉ emo꞉wo꞉ dabu ba꞉dakiyo꞉, Fol e a꞉ma꞉la꞉ Ya꞉lusalem iliga꞉foma꞉ki, ha꞉na꞉lo sio꞉. Mo꞉wo꞉ Fol e Ya꞉lusalemo꞉ yalikiyo꞉, iliyo꞉ e toga banaifo꞉la꞉ga꞉ a꞉na sana soma꞉no꞉ dimidaifo꞉liki, dabu ba꞉ba꞉. 4 Iliyo꞉ a꞉la꞉dabu ba꞉dabiki, Festus eyo꞉ a꞉ma꞉la꞉ a꞉la꞉sio꞉, “Fol e Sesalia dibolo aya sab a꞉la꞉ta꞉ga꞉ ne a꞉namio꞉ ko꞉na꞉ma ha꞉na꞉no꞉. 5 A꞉la꞉fo꞉ko꞉lo꞉ Fol e hendele halabo꞉ dimido꞉lalega, misa꞉ kalu gililo꞉wo꞉ nolo꞉ ne o꞉lia꞉ ha꞉na꞉sa꞉ga꞉, a꞉na mo꞉walilima꞉no꞉” a꞉la꞉sio꞉.

6 Festus e ho꞉len ola꞉fo꞉ o꞉ do꞉la꞉fo꞉ i o꞉lia꞉ o꞉la꞉ga꞉yo꞉, e Sesalia a꞉na ti ane ko꞉lo꞉, ho꞉len a꞉ma꞉ fa꞉s amio꞉, e mo꞉walilima꞉no꞉ aya ha꞉na꞉ga꞉ silikiyo꞉, Fol e mena꞉ki, ho꞉ido꞉. 7 Fol e a꞉na tindabikiyo꞉, Yu kalu Ya꞉lusalem a꞉la꞉ta꞉ga꞉lo꞉ mio꞉ i a꞉ma꞉yo꞉, Fol e banagalia꞉foliki, elo꞉ mogago꞉ dimido꞉ a꞉no꞉ Festus e dabuma꞉ki sa꞉la꞉len ko꞉sega, hendele sa꞉lab a꞉la꞉bo꞉ mo꞉fanda asulo꞉. 8 Iliyo꞉ emo꞉wo꞉ diga꞉li sa꞉la꞉sa꞉ga꞉yo꞉, Fol eyo꞉ enena꞉ma꞉la꞉ asuwa꞉takiyo꞉ a꞉la꞉sio꞉, “Niyo꞉ Yuwa꞉ mano꞉ mada mo꞉o꞉go꞉so꞉ a꞉la꞉ta꞉ga꞉, Godeya꞉ Malilo꞉ a a꞉no꞉ mo꞉mogagila꞉ a꞉la꞉ta꞉ga꞉ gamani misa꞉ kalu Sisamo꞉wo꞉ mogago꞉lo꞉ mo꞉dimido꞉.” 9 Fol eyo꞉ a꞉la꞉sa꞉la꞉sa꞉ga꞉, Festus eyo꞉ Yu kaluwo꞉ sagale alitakiyo꞉, Folbo꞉wo꞉ a꞉la꞉dabu ba꞉ba꞉, “Ge Ya꞉lusalem ha꞉na꞉sa꞉ga꞉, ililo꞉ gemo꞉lo꞉ diga꞉lilab we, ni siwa꞉la mo꞉walilima꞉no꞉wo꞉ o꞉liyele?”

10 A꞉la꞉dabu ba꞉dabiki, Fol eyo꞉ a꞉la꞉sio꞉, “A, ne Sisa elo꞉ mo꞉walilan a wena mo꞉walilab ko꞉lo꞉ ne wenaka mo꞉walilima꞉no꞉. Niyo꞉ Yu kaluka꞉isalemo꞉wo꞉ halabo꞉ mada mo꞉dimido꞉ a꞉la꞉bo꞉ giyo꞉ asulo꞉. 11 Niyo꞉ hala nowo꞉ dimido꞉ ami sana soma꞉no꞉ kibo꞉bowo꞉, ne mo꞉nai ho꞉no꞉bo꞉lo. Ko꞉sega ililo꞉ nemo꞉lo꞉ su agelabko꞉ hendelema ko꞉lo꞉ giyo꞉ ili dagi amio꞉ dia꞉tab a꞉no꞉ digalo꞉ma. Ne mada Sisa ene mo꞉walilima꞉ki asulab.”

12 Festus eyo꞉ to a꞉no꞉ ene kanisol o꞉lia꞉ nenela꞉sa꞉ga꞉, eyo꞉ a꞉la꞉sio꞉, “Ge Sisamo꞉wo꞉ mo꞉walilima꞉ki dabuba꞉daleba꞉ ko꞉lo꞉ ge Sisalo꞉wa ha꞉na꞉ib.”

Festus eyo꞉ misa꞉ kalu Agiliba o꞉lia꞉ nenelo꞉.

13 Ho꞉len nolo꞉ ta꞉ta꞉sa꞉ga꞉yo꞉, misa꞉ kalu Agiliba o꞉lia꞉ ado Benaisi o꞉lia꞉yo꞉ Festuso꞉ ba꞉ba꞉ni ya꞉sa꞉ga꞉, Sesalia a꞉na fa꞉la꞉dowo꞉. 14 A꞉la꞉yo꞉ ho꞉len modo꞉wo꞉ a꞉na silikiyo꞉, Festus eyo꞉ Fol elo꞉ mo꞉walilo꞉ a꞉no꞉ misa꞉ kalu o꞉lia꞉ nenelaki a꞉la꞉sio꞉, “Fela꞉ks elo꞉ dibolo kalu nowo꞉ wenaka to꞉lo alita꞉ga꞉ ta꞉fo꞉gane ko꞉lo꞉lab. 15 Ne Ya꞉lusalemdo꞉ ane amio꞉, bobalo꞉ so꞉mia꞉sen misa꞉ kalu i o꞉lia꞉ Yu ko꞉go꞉do꞉ kalu o꞉lia꞉ i a꞉ma꞉ nemo꞉ aloba꞉da꞉sa꞉ga꞉ wa꞉dema꞉ki, salifa꞉. 16 Ko꞉sega niyo꞉ imo꞉wo꞉ a꞉la꞉sio꞉, ‘Lom nili man amio꞉, kalu noma꞉yo꞉ kalu nolbo꞉wo꞉ towo꞉ diga꞉li sa꞉la꞉sa꞉ga꞉, mo꞉ mo꞉walilo꞉ amio꞉, “e dimido꞉” a꞉la꞉bo꞉ mo꞉sa꞉la꞉sen. Tamin amio꞉ emo꞉lo꞉ diga꞉li sa꞉lab kalu o꞉lia꞉ kagafo꞉likiyo꞉, eyo꞉ towo꞉ dinafa fanda sa꞉lab ami, niliyo꞉ mo꞉walilia꞉sa꞉ga꞉, a꞉na fanda ga꞉fa꞉ib.’ 17 Niyo꞉ imo꞉wo꞉ to a꞉no꞉ wido꞉ ko꞉lo꞉ ne a꞉ma꞉la꞉ yakiyo꞉, i o꞉lia꞉ mio꞉ ko꞉lo꞉ ho꞉len a꞉ma꞉ fa꞉s amio꞉ niyo꞉ iyo꞉ mo꞉ka꞉laki, ne mo꞉walila꞉sen aya ha꞉na꞉ga꞉ silikiyo꞉, kalu a꞉no꞉ mena꞉ki ho꞉ido꞉. 18 Yu kaluwa꞉yo꞉ dasila꞉sa꞉ga꞉ Fol elo꞉ hala dimido꞉ sa꞉lab amio꞉, nilo꞉ asulo꞉ a꞉no꞉ iliyo꞉ a꞉la꞉bo꞉ mo꞉sio꞉. 19 Iliyo꞉ ini gulugululan man a꞉no꞉lia꞉ sowo꞉ kalu nowo꞉ ene wiyo꞉ Ya꞉su a꞉no꞉lia꞉ sa꞉laki kego꞉. Kalu a꞉no꞉ dasila꞉sa꞉ga꞉, mela꞉no꞉ a꞉lab a꞉la꞉liki Fol e sio꞉ ko꞉lo꞉ egelebo꞉ towa꞉yo꞉ kego꞉. 20 To ililo꞉ sa꞉lab a꞉no꞉ ko꞉lo꞉ nilo꞉ alobana walama꞉no꞉ babale dowabiki, niyo꞉ kalu e Ya꞉lusalem ha꞉na꞉sa꞉ga꞉ a꞉na mo꞉walilima꞉ hamana꞉ki, dabu ba꞉ba꞉. 21 Ko꞉sega e a꞉la꞉bo꞉ mo꞉dimidama꞉no꞉ a꞉laki, e Sisa ene mo꞉walilima꞉ki, dibolo aka yasi mesa꞉no꞉ asulo꞉ ko꞉lo꞉ niyo꞉ e Sisalo꞉ amio꞉ iliga꞉fa꞉no꞉ togo꞉ semo꞉ ba꞉dabiki, e dibolo ka ta꞉fo꞉lo꞉l.” 22 Festus eyo꞉ a꞉la꞉sa꞉labiki, Agiliba eyo꞉ a꞉la꞉sio꞉, “Kalu a꞉ma꞉ enedo꞉ to sa꞉labo꞉, no꞉no꞉n mada da꞉ba꞉no꞉ asulab.” A꞉la꞉ta꞉ga꞉ Festus a꞉la꞉sio꞉, “Ge ali da꞉ba꞉ib.”

Fol eyo꞉ Agiliba emo꞉wo꞉ malolo꞉ me.

23 Ho꞉len a꞉ma꞉ fas amio꞉ Agiliba o꞉lia꞉ Benaisi o꞉lia꞉yo꞉ ya꞉ga꞉ yakiyo꞉, kaluka꞉isaleyo꞉ a꞉la꞉ma꞉ wiyo꞉ wabulu sio꞉ ko꞉lo꞉, kegea꞉sen aya tinakiyo꞉, da꞉la꞉di misa꞉ kalu i o꞉lia꞉ ko꞉go꞉do꞉ kalu o꞉lia꞉yo꞉ egele ti ane. Festus eyo꞉ Folo꞉ tililia꞉ mena꞉ki sio꞉ ko꞉lo꞉, Folo꞉ tililia꞉ fa꞉la꞉dowabiki, 24 Festus eyo꞉ a꞉la꞉sio꞉, “Misa꞉ kalu Agiliba, ge a꞉la꞉ta꞉ga꞉ kaluka꞉isale wenamilo꞉ kegeo꞉ gio꞉ kalu we bo꞉ba. Ne Ya꞉lusalemdo꞉ ane amio꞉, Yu kaluka꞉isale ililo꞉ gadio꞉wo꞉ nemo꞉ sa꞉ma꞉ mio꞉ a꞉la꞉ta꞉ga꞉ Sesalia a꞉namio꞉lo꞉ nelo꞉wa ya꞉sa꞉ga꞉, kalu we sanalema꞉no꞉ a꞉la꞉likiyo꞉ halale sio꞉. 25 Niyo꞉ mo꞉walilo꞉ amio꞉, elo꞉ sanalema꞉no꞉ man hala dimido꞉ nowo꞉ mo꞉ba꞉ba꞉ ko꞉sega, eneno꞉ e Sisamo꞉ mo꞉walilima꞉ki a꞉la꞉dabu ba꞉dabiki, niyo꞉ e Lom a꞉na iliga꞉fa꞉no꞉ saefa꞉. 26 Niyo꞉ e iligetakilo꞉ hala elo꞉ dimido꞉ a꞉no꞉ sa꞉sa꞉lelia꞉ga꞉, Lom alan misa꞉ kalumo꞉lo꞉ iliga꞉fa꞉no꞉wo꞉ mo꞉bo꞉do꞉l ko꞉lo꞉ o꞉gdo꞉ kalu kegeo꞉ gio꞉ tambo a꞉la꞉ta꞉ga꞉ misa꞉ kalu Agiliba gilo꞉ tambo dabuma꞉kiyo꞉, kalu we gilo꞉wa tililia꞉mio꞉. To elo꞉ sa꞉lab a꞉no꞉ nio꞉ da꞉da꞉sa꞉ga꞉ nenelakiyo꞉, mo꞉fo꞉s amilo꞉ nilo꞉ sa꞉sa꞉lima꞉no꞉wo꞉ a꞉na doma꞉ib. 27 Mo꞉wo꞉ niyo꞉ dibolo kalu nowo꞉ elo꞉ hala dimido꞉wo꞉ mo꞉fo꞉s amio꞉ mo꞉sa꞉sa꞉la꞉sa꞉ga꞉ iligetalega, man a꞉no꞉ hala dimidama꞉no꞉lo꞉b a꞉la꞉asulo꞉l.” Festus eyo꞉ imo꞉wo꞉ a꞉la꞉sio꞉.